செவ்வாய், 20 ஜூன், 2017

E=mc2

பொருட்களின் நிறைக்கும், அதில் பொதிந்துள்ள ஆற்றலுக்கும் உள்ள தொடர்பை மிகத் தெளிவாக விளக்க ஆல்பர்ட் ஐன்ஸ்டீனால் கூறப்பட்ட சமன்பாடு.

E=mc2

“ஒரு பொருளின் நிறையை, ஒளியின் வேகத்தின் வர்க்கத்துடன் பெருக்கினால் எவ்வளவு கிடைக்குமோ அவ்வளவு ஆற்றல் ஒவ்வொரு பொருளிலும் மறைந்துள்ளது” என்பதே அந்த சமன்பாட்டின் சாரம்.

அதன்படி ஒரு கூழாங்கல்லுக்குள் கூட அபரிமிதமான ஆற்றல் ஒளிந்திருக்கிறது. ஆனால் நமக்குத் தெரியவில்லை. அவ்வளவுதான்.

நவீன அறிவியல் உலகப் பொருட்கள் கதிர் வடிவிலும், நிறையுடன் கூடிய பொருள் வடிவிலும் என இரு நிலையில் காட்சியளிக்கின்றன என்று கூறுகிறது.

அணுவில் இருக்கும் வெளிப்புறப்பாதையான எலக்ட்ரான்களின் வட்டத்திலும், அந்த எலக்ட்ரான்களின் துணைகொண்டுமே பெரும்பாலான வேதியியல் மாற்றங்கள் நடக்கின்றன. அந்த எலக்ட்ரான்களின் வட்டத்திலோ மிகக்குறைவான ஆற்றலே உள்ளது.

ஆனால் அதையும் தாண்டி அபரிமிதமான ஆற்றல் அணுக்கருவினுள் இருக்கின்றது. அதை வெளியில் எடுப்பதும் கடின காரியம். வெளியில் எடுத்தால் கிடைக்கும் ஆற்றலும் அபரிமிதமானதாகும்.

அப்படி அணுக்கருவினுள் இருக்கும் ஆற்றலை வெளியில் எடுத்துதான் அணுகுண்டு வெடிக்கப்படுகிறது. அணு உலைகள் மின்சாரத்தை தயார் செய்கின்றன.

நாம் பார்க்கும் பொருட்கள் அனைத்தும் பொருளல்ல. ஆற்றல் ஓய்வில் இருக்கும் வடிவமே. அது போல ஆற்றல் என்பது பொருளிலுள்ள சக்தி இயக்கத்தில் வருவதே. ஆக பொருள், ஆற்றல் என்ற இரண்டும் பிரபஞ்ச இருப்பின் இருவேறு வடிவங்களே.

அபரிமிதமான ஆற்றல் துகள்களாக அணுக்கருவினுள் வைக்கப்பட்டுள்ளது. அணுக்கருவை பிளந்தால் எத்தனை ஆற்றல் வெளிப்படுமோ அத்தனை ஆற்றல் அந்தத் துகள்களை ஒன்று சேர்த்து அணுக்கருவை உருவாக்க பயன்படுத்தப்பட்டிருக்கிறது.

மேலும் புரியும் படியாகக் கூற வேண்டுமாயின், ஒரு கிலோகிராம் பொருளில் உள்ள அனைத்து அணுக்கருக்களையும் பிளக்கும் போது வெளிப்படும் ஆற்றல், நாற்பது மெகா டன் டி.என்.டி வெடிமருந்தை வெடிக்கும்போது கிடைக்கும் ஆற்றலுக்கு சமம். 

வேறுவிதமாகக் கூறினால், அந்த ஆற்றலைக் கொண்டு நூறு லட்சம் வீடுகளுக்கு மூன்றாண்டுகளுக்கு தடையற்ற மின்சாரத்தை வழங்கமுடியும்.

ஒரு கிலோகிராம் பொருளுக்குள்ளே இவ்வளவு சக்தி இருக்குமாயின், எழுபது கிலோ மனிதனுக்குள் எவ்வளவு சக்தி இருக்கும்? ஒரு லாரி மண்ணிலே எவ்வளவு சக்தி இருக்கும்?

அப்படியென்றால் இந்த பூமியின் மொத்த நிறையிலும் எவ்வளவு சக்தி இருக்கும்? பிரபஞ்சத்திலுள்ள மொத்த சக்தி எவ்வளவு இருக்கும்?
அப்பப்பா......! தலையே சுற்றுகிறதா?..

ஞாயிறு, 18 ஜூன், 2017

ஆண் பிள்ளை அழக்கூடாது

“இந்த உலகம் நேர் எதிர் இரட்டைகளால் ஆனது. இரண்டு தன்மைகளும் ஒன்று கூடியே முழுமையை உருவாக்குகின்றன. மேலும் அந்த தன்மைகளில் அதன் எதிர் தன்மையின் கூறு கொஞ்சமேனும் இருக்கும்” என்று யின்-யாங் தத்துவம் கூறுகிறது.

அது உண்மைதான்.

உலகில் உள்ள எல்லா விசயங்களும் மேடு - பள்ளம், பகல் – இரவு, மகிழ்ச்சி – துக்கம், வாழ்வு – மரணம், அன்பு – வெறுப்பு என்று இரட்டைகளாகத்தான் இருக்கின்றன.

அது போல ஆண்மையில் பெண்மையும், பெண்மையில் ஆண்மையும் இருக்கிறது என்பதையே அர்த்தநாரீஸ்வரர் கோலம் விளக்குகிறது.

பெண்ணை அமைதியாக, பொறுமையாக இருக்க இந்த சமூகம் பயிற்றுவிப்பதைப் போல் ஆணை அழக்கூடாது, வெட்கப்படக் கூடாது என்று பயிற்றுவிக்கிறது. இவை இரண்டுமே முட்டாள்தனமானவை. மேலும் இயற்கைக்கு எதிரானவை.

ஒரு பெண் என்பவள் பெண்மை தன்மை அதிகம் கொண்டவள்தான். ஆனால் அவளுக்குள் ஆண்மையும் கொஞ்சம் இருக்கும்.

அவளும் சில சமயங்களில் கோபம் கொள்வாள். முரட்டுத்தனமாக நடந்து கொள்வாள். போராடுவாள். இதெல்லாம் இல்லாமல் பெண் என்பவள் இல்லை.

அது போல ஆணும் எந்த நேரத்திலும் போராட்ட குணத்துடனேயே இருக்க முடியாது. தாயைப் போல இருக்கவும் செய்வான். கஷ்டத்தை கண்டு அழுவான். கழிவிரக்கம் கொள்வான். இவையெல்லாம் ஆணுக்குள் இருக்கும் பெண்மையின் வெளிப்பாடுகள்.

ஆனால் சமூகம் ஆணுக்குள் இருக்கும் பெண்மையை அழிக்கவே நினைக்கிறது. மனைவியோடு சமாதானமாகப் போனால் பெண்டாட்டி தாசன். அழுதால் பெட்டை. இப்படி தூற்றுகிறது.

அதென்ன தத்துவம் என்று விளங்கவில்லை. 

“ஆண் பிள்ளை அழக்கூடாது”

இதை ஆண் பெண் பாகுபாடு இல்லாமல் அனைவரும் கூறுகிறார்கள். அவன் அழுதால் கரைந்து போய்விடுவானா என்ன?

அழுகை வரும் போது அழுது பாருங்கள். எத்தனை விடுதலை உணர்வு வருகிறது என்று புரியும். இல்லையென்றால் கோபம் தலைக்கேறும். விரக்தி உருவாகும். தொண்டை அடைக்கும். எந்த வேலையிலும் கவனம் செல்லாது.

நீண்ட நெடுங்காலமாக ஆணுக்குள் இருக்கும் பெண்மையும், பெண்ணுக்குள் இருக்கும் ஆன்மையும் அமுக்கப்பட்டே வந்திருக்கிறது.

இக்காலத்தில் பெண்ணியவாதிகள், பெண்ணுக்குள் இருக்கும் ஆண்மையை கிளர்ந்தெழ வைத்து விட்டார்கள். ஆனால் ஆணுக்குள் இருக்கும் பெண்மைக்கு இன்னமும் அங்கீகாரம் கிடைக்கவில்லை.

உலகில் ஆண்மைத்தன்மை அதிகரித்து விட்டது. எங்கும் போராட்டம் உருவாகிக் கொண்டு வருகிறது. இப்போது பெண்மையின் அரவணைப்பு உலகிற்கு தேவைப்படுகிறது.

ஆண் தனக்குள் இருக்கும் பெண்மையை கண்டு கொள்ள வேண்டும். அழத் தோன்றினால் அழ வேண்டும். வெட்கம் வந்தால் அதை அனுமதிக்க வேண்டும். அது போல பெண்ணும் தனக்குள் இருக்கும் ஆண்மையை கண்டு கொள்ள வேண்டும். சத்தமாக சிரிக்கத் தோன்றினால் சிரிக்க வேண்டும். எதுவும் தவறல்ல. இதெல்லாம் ஒரு நல்ல சமிக்ஞை.

ஆணுக்குள் பெண்மை இருப்பதற்கும், பெண்ணுக்குள் ஆண்மை இருப்பதற்கும் மதிப்பளியுங்கள். எல்லாம் நலமாக இருக்கும்.

திங்கள், 29 மே, 2017

டேட்டா - ஒரு சாபம்

கடந்த திமுக ஆட்சியில் தொலைக்காட்சி இலவசமாகத் தரப்படும் என்ற அறிவிப்பு வந்தபோது ஒரு பெரியவர் கூறினார், “அது உங்களுக்குத் தரப்படும் பரிசு அல்ல. அது ஒரு வியாபாரம். இலவசமாக தொலைக்காட்சியை கொடுத்தபின் தான் வைத்திருக்கும் தொலைதொடர்பு நிறுவனங்களில் ஒளிபரப்பாகும் நிகழ்ச்சிகள் மூலமாக இலவசமாக கொடுத்த பொருளுக்கான தொகையை மீண்டும் சம்பாதித்து விடலாம். ஆனால் மக்கள் நிரந்தரமாக தொலைக்காட்சி நிகழ்ச்சிகளுக்கு அடிமையாகி தன்னை மறந்து விடுவார்கள்.”

அது இன்று உண்மையாகி விட்டது. மக்கள் தொலைக்காட்சிக்கு தொடர்களுக்கு அடிமையாகி விட்டனர்.

இன்று இண்டர்னெட் டேட்டா மிகவும் குறைந்த விலையில் கிடைக்கிறது. அது ஒரு வரப்பிரசாதம் என்று எண்ண வேண்டாம். இது ஒரு சாபம்.

இன்றைக்கு ஏற்கனவே நிறைய பேர் ஆண்டிராய்டு பைத்தியங்களாகி விட்டனர். செல்போன் இல்லாமல் அவர்களால் இருக்க முடியாது. குடிகாரர்களை விட மோசமாக அடிமையாகிவிட்டனர். இதில் குடிகாரர்கள் தேவலம்.

எல்லோரும் பயன்படுத்துவதால், எல்லோரும் தன்னைப் போலவே அடிமையாக இருப்பதால் ஒன்றும் பிரச்சனை இல்லை எண்ண வேண்டாம். ஆண்டிராய்டு போனுக்கு அடிமையாவதும் ஒரு பிரச்சனைதான்.

இப்போது அந்தப் பிரச்சனைக்கு வீரியத்தைக் கூட்டி விட்டது. இந்த குறைந்த விலையில் கிடைக்கும் டேட்டா. ஒரு நாளைக்கு கிடைக்கும் ஒரு ஜிபி டேட்டாவை பயன்படுத்திவிட வேண்டும் என்று முக்கிய வேலைகளை ஒதுக்கி இண்டர்னெட் பார்க்கும் முட்டாள்தனமான வேலையை இன்று நிறைய பேர் செய்கிறார்கள்.

மேலும் பயன்படுத்துவது ஒன்றும் உருப்படியான வேலையில்லை. ஃபேஸ்புக், வாட்ஸப் பயன்படுத்துவது. அதிலேயும் ஒன்றும் இல்லை.

முந்தைய நாட்களில், தெருமுனையில் குட்டிசுவற்றில் இருந்து பேசுபவர்களை வெட்டிப்பயல் என்று கூறுவார்களே, அம்மாதிரி குட்டிசுவரில் பேசுவதைத்தான் பேஸ்புக்கிலும் பேசுகிறார்கள்.

இதை விட்டால் ஏதாவது ஒரு விளையாட்டு, யூடியுப் வீடியோக்கள், சினிமா செய்திகள். எல்லாமே குப்பை.

கொஞ்சம் பேர் நம்மை பொல ப்ளாக் படிப்பது. ப்ளாக்குகளும் கொஞ்சம் தான் உருப்படி. நிறைய குப்பைதான்.

இந்த மீடியாக்கள் இருக்கிறதே அவர்கள் இன்னும் மோசம். விபச்சாரி அளவுக்கு இறங்கி விட்டார்கள். அவர்களுக்கு டிஆர்பி வேண்டும் என்றால் என்ன வேண்டுமானாலும் எழுதுகிறார்கள்.

இந்த நிலை தொடரும்போது குடிகாரர்களுக்கு மறுவாழ்வு மையம் வைப்பது போல, செல்போன் அடிமைகளுக்கும் மறுவாழ்வு மையம் துவங்க வேண்டும் எனும் நிலை உருவாகும்.

திங்கள், 17 ஏப்ரல், 2017

தேவையான வரலாறு-5 (க்ளாடி ஈதர்லி, ஐன்ஸ்டீன்)

“இரண்டாம் உலகப்போர் நடந்தது. அமெரிக்கா ஹிரோஷிமா, நாகசாகி மீது அணுகுண்டு போட்டது” என்றுதான் வரலாற்றிலே கற்றுத்தரப்படுகிறது. அதனைத் தொட்டு நடந்த நெஞ்சை உருக்கும் பல சம்பவங்கள் கற்றுத்தரப்படவில்லை. மேலும் நமக்கு அவற்றைக் கற்றுக் கொள்வதில் போதிய ஆர்வம் இல்லை.

குண்டு போடச்சொன அமெரிக்காவின் ஆணையை ஏற்று அதை வெற்றிகரமாக நிறைவேற்றியவன் க்ளாடி ஈதர்லி என்கிற அமெரிக்க மேஜர். அவனுக்கு தொடர்ந்து பல பதக்கங்களும், பரிசுகளும் வழங்கப்பட்டன.

தனது கணவன் பதக்கம் வாங்கியதைக் கேள்விப்பட்டு மிகவும் மகிழ்ந்தாள் அவன் மனைவி. ஆனால் அந்தப் பதக்கங்கள் பல ஆயிரம் உயிர்களைக் காவு வாங்கியதற்காக தரப்பட்டது என்று அறிந்தவுடன் அவள் கணவனை முழுவதுமாக வெறுத்தாள். பிள்ளைகள் அவனை ஒரு எமனைப் போல பார்க்கத் துவங்கினர். விவாகரத்து கேட்டாள் என்றும் சிலர் கூறுகின்றனர்.

முழுநேரக் குடிகாரன் ஆனான். ஓராண்டிற்குள் கியூபாவிற்கு சட்ட விரோதமாக ஆயுதம் கடத்த முயற்சித்தான் என எந்த அமெரிக்காவுக்காக வேலை செய்தானோ அதே அமெரிக்காவால் குற்றம் சாட்டப்பட்டான். வேலையில் இருந்தும் துரத்தப்பட்டான். தொடர்ந்து சிறைத்தண்டனை.

மன உளைச்சல் மற்றும் குற்ற உணர்ச்சியில் தற்கொலைக்கு முயன்றான். ஆனால் அவனை எமனும் ஏற்றுக் கொள்ளவில்லை. மனநிலை பாதிக்கப்பட்டு பைத்தியக்காரனாக டெக்ஸாசில் ஒரு மருத்துவமனையில் சேர்க்கப்பட்டான்.

பின் கொஞ்சம் குணமானான். தொடர்ந்து ஓரிடத்தில் விற்பனையாளராக பணியாற்றினான். மீண்டும் கொடூரமான ஆயுதம் தாங்கி கொள்ளையடிக்க முற்பட்டான் என்று குற்றம் சாட்டப்பட்டான். சிறைத்தண்டனை. மீண்டும் தற்கொலை முயற்சி செய்தான். மீண்டும் எமன் அவனை ஏமாற்றினான். தொடர்ந்து நிரந்தர பைத்தியமானான். அதன் பிறகு அவன் என்ன ஆனான் என்ற சரியான தகவல் கிடைக்கவில்லை.

அவனுக்கு வைத்தியம் செய்த மனநல மருத்துவர், “இந்த மனிதன் மனதில் தனது மனைவி, குழந்தைகள், மற்ற மனிதர்கள், சமூகம் குறித்த எந்தவித நியாய உணர்வோ, பொறுப்புணர்ச்சியோ சிறிதும் இல்லாதவனாக இருக்கிறான்” என்று அவனது ஆழ்மனதை ஆராய்ந்து கூறுகிறார்.

ஆனால் மற்றொருபுறம் அணுகுண்டு போடப்பட்டதில் இருந்து இரண்டு நாட்கள் ஒரு பச்சைக் குழந்தையைப் போல தனியறையில் தேம்பித் தேம்பி அழுகிறார் உலகின் தலைசிறந்த விஞ்ஞானி ஆல்பர்ட் ஐன்ஸ்டீன்.

ஏனெனில் E=mc2 என்ற அறிவியல் சமன்பாட்டை வகுத்து அதனை வெளியிட்டவர் அவர்தான். மேலும் அதனை சரியாகப் புரிந்துகொள்வதன் மூலம் அணு சக்தியை வெளிக்கொண்டு வரலாம், ஆயுதமும் தயாரிக்கலாம் என்று அமெரிக்க அரசுக்கு கடிதமும் எழுதியவர் ஆல்பர்ட் ஐன்ஸ்டீன்.

தான் கண்டுபிடித்த்தன் நோக்கம் சரியானதுதான் என்றாலும் அது அரசியல்வாதிகளின் கைகளில் அகப்பட்டு அழிவுசக்தியாக மாறுவதை அவராலும் தடுக்க முடியவில்லை. ஆகையால்தான் பிரபஞ்ச சக்திகளைப் பயன்படுத்தும் சூட்சுமத்தை விஞ்ஞானமாக அனைவருக்கும் கற்றுத்தராமல் அதை ஆன்மீகத்தோடு இணைத்து வைத்தனர் போலும் நமது முன்னோர்கள்.

வன்முறைப் பாதையில் தான் செய்த பாவத்தால், அது அளித்த சாபத்தால் வாழ்வை அழித்துக் கொண்டவன் வரலாறும், உலகம் போற்றும் விஞ்ஞானியானாலும் அவரால் நிகழந்த பெரும் தவறும் மனிதன் அறிந்துகொள்ள வேண்டிய வரலாறு.